Пётр Іванавіч быў вельмі сур’ёзным і патрабавальным выкладчыкам, з чаго ўсе студэнты проста абавязаны былі ведаць асновы навуковых даследаванняў. Яго баяліся студэнты, але ў мяне са здачай гэтага прадмета не было праблем і ў студэнцкія часы, ды і ў апошнія гады мы праводзілі сумесныя навуковыя даследаванні разам. Магчыма, і дзякуючы яму, нашы дзялянкі на вопытным полі заўсёды выглядалі файна. Па маёй просьбе Пётр Іванавіч прыйшоў на ФВМ, падзяліўся сваімі ўспамінамі ды фотаздымкамі.
Нарадзіўся Пётр Мазоль 10 сакавіка 1936 года ў в.Угрынь Зэльвенскага раёну. Дзяцінства было такім жа, як і ў іншых у тыя часы. Добра памятаецца пачатак Вялікай Айчыннай вайны, гады акупацыі і той ліпеньскі дзень вызвалення ў 1944 годзе. Адразу ж, у верасні 1944 пайшоў у першы клас пачатковай школы ў роднай вёсцы. Школа была спаленая і малыя займаліся ў прыватных хатах. 5-7 класы заканчваў у сямігадовай школе в.Вострава, 8-10 класы ў Дзярэчынскай СШ. Штодня прыходзілася пешкі пераадольваць спачатку 3 км, а пасля ажно 5. Акрамя вучобы займаўся работамі ў бацькоўскай гаспадарцы: пасвіў жывёлу, працаваў у агародзе і ў полі. Пасля заканчэння школы ў 1954 годзе паступіў на агранамічны факультэт Гродзенскага сельскагаспадарчага інстытута. Абітурыентамі пры паступленні былі тыя, хто пайшоў у першы клас у першы пасляваенны год, таму і конкурс быў не малы.
На першым курсе частка студэнтаў жыла на прыватных кватэрах і толькі на другім усе былі паселеныя ў новы інтэрнат, пабудаваны на вуліцы Сацыялістычная 53. Студэнцкія гады самыя цікавыя ў біяграфіі маладых людзей. Адначасова з атрыманнем адукацыі па спецыяльнасці выхоўваліся ў калектывізме і сяброўстве, прымалі ўдзел у мастацкай самадзейнасці, спорце і грамадскім жыцці. Наладзіліся добрыя сувязі са студэнтамі педінстытута, якія жылі ў інтэрнаце праз вуліцу. 4 група, у якой вучыўся Пётр Мазоль, ездзіла ў Каўнас у сельскагаспадарчую акадэмію. Стараліся вучыцца, нягледзячы на недахоп патрэбнай літаратуры. У станаўленні маладых спецыялістаў вялікую ролю адыгрывалі выкладчыкі, камсамольская і прафсаюзная арганізацыі.
З удзячнасцю прыгадваюцца тагачасныя выкладчыкі кафедры агульнага земляробства, такія як Мацвей Сцяпанавіч Севярцаў, Іван Сямёнавіч Моць, Уладлен Аляксандравіч Іваноў, Юрый Леонцьевіч Лаўрэнцьеў, Сяргей Сцяпанавіч Лябецкі, Мікалай Васільевіч Мартынчык, Анатоль Міхеевіч Карпіцкі, Аляксей Аляксеевіч Воладась, Марыя Мікалаеўна Капорына, Фёдар Антонавіч Хрышчановіч, Генадзь Канстанцінавіч Гарчычка і іншыя. Ад другога курса Пётр Мазоль займаўся навуковымі даследаваннямі. За кафедрай было замацавана 6 гектараў вопытнага поля (якое знаходзілася там, дзе зараз Дзевятоўка), на якіх вывучаўся 6-польны севазварот, у якім даследаваліся розная апрацоўка глебы і тэхналогіі вырошчвання розных сельскагаспадарчых культур. Пасля заканчэння 3-га курса па закліку камсамола ў 1957 годзе ездзіў у складзе атрада студэнтаў Гродзеншчыны на ўборку цаліннага ўраджаю ў Казахстан. Карысць ад паездкі была двухбаковай – на практыцы замацоўваліся веды аб цалінных і залежных глебах, а таксама студэнты атрымоўвалі больш шырокае прадстаўленне аб прасторах савецкай краіны. Нядаўна, ў сувязі з 50-годдзем асваення цаліны, група супрацоўнікаў ГДАУ была ўзнагароджана медалем “50 лет целине». Пасля заканчэння інстытута ў 1959 годзе Пётр Мазоль быў накіраваны на працу аграномам ў калгас імя Леніна Свіслацкага раёна. Якраз сельгас тэхніка з МТС была перададзеная непасрэдна гаспадаркам, але яе было недастаткова. Трэба было набываць усе, што патрабавалася па тэхналогіі вырошчвання сельскагаспадарчых культур.
Веды, набытыя на кафедры механізацыі спатрэбіліся пры набыцці машын, рэгуліроўках іх, праверцы якасці работ. За два гады былі набытыя сеялкі, культыватары для міжраднай апрацоўкі абганяльных культур, два пагрузчыкі арганічных угнаенняў. Упершыню ў 1959 годзе ў пасевах ярыны была праведзена пробная праверка хімічнай праполкі, якая аказалася вельмі эфектыўнай. За зіму былі закуплены гербіцыды для ўсёй плошчы яравых збожжавых, ільну і кукурузы, апырсквальнік.
У 1961 годзе па прапанове загадчыка кафедры агульнага земляробства, дэкана агранамічнага факультэта Мацвея Сцяпанавіча Севярцава Пётр Іванавіч Мозаль быў прыняты асістэнтам на кафедру агульнага земляробства, на якой і працаваў асістэнтам, старшым выкладчыкам да 2009 года. Не адзін раз павышаў кваліфікацыю: у 1969 годзе – Уманскі СГІ, у 1976 і 1981 гадах у Ленінградскім СГІ, а ў 1986 годзе быў на курсах па вылічальнай тэхніцы ў Кубанскім СГІ (Краснадар). Вёў заняткі па земляробству і асновах навуковых даследаванняў. Займаўся навуковымі даследаваннямі, кіраўніцтвам дыпломных прац, якіх было абаронена студэнтамі больш, чым 100. У апошні год сваёй працы разам з Аляксандарам Аляксандравічам Дудуком выдаў вучэбны дапаможнік “Научные исследования в агрономии”.
Ілюстрацыі да працоўнай біяграфіі Пятра Іванавіча прадстаўлены тут:
Матэрыял падрыхтаваны дацэнтам кафедры мікрабіялогіі і эпізааталогіі
Мікалаем Таранда