Паважаныя сябры! З 28 лістапада па 8 снежня 2016 года на першым паверсе галоўнага корпуса Гродзенскага дзяржаўнага аграрнага ўніверсітэта, ля ўвахода ў бібліятэку (вул. Церашковай, 28), адкрыта фотавыстава работ выпускніка агранамічнага факультэта 1980 года нашага ўніверсітэта Уладзіслава Станіслававіча Цыдзіка.
Выстава прысвечана прэзентацыі фотапаэтычнага альбома "Зачараваны Беларуссю", якая адбудзецца 8 снежня 2016 года з 13.00 гадзін у 8 зале. Шчыра запрашаем!
Фотапаэтычны альбом “Зачараваны Беларуссю” сёлета пабачыў свет у РВУ “Выдавецкі дом “Звязда”.
Аўтар выдання – Уладзіслаў Цыдзік, выпускнік нашага ўніверсітэта, які значную частку свайго жыцця прысвяціў сельскай гаспадарцы, працаваў у органах Дзяржкантролю, быў намеснікам старшыні Пастаяннай камісіі Палаты прадстаўнікоў Нацыянальнага сходу Рэспублікі Беларусь па аграрнай палітыцы 5 склікання.
Прэзентацыі альбома папярэднічае фотавыстава, якая дзейнічае ў ВНУ з 28 лістапада бягучага года. У яе аснове – фотакалекцыя работ, якія вабяць прыгажосцю прыроды Беларусі, здзіўляюць яе архітектурнымі адметнасцямі.
Фотаальбом – друкаваная версія таго, што зачаравала, захапіла назіральнага фотааматара, і сваімі ўзнёслымі пачуццямі ён з задавальненнем дзеліцца з гэткімі ж нераўнадушнымі да ўсяго прыгожага чытачамі. Менавіта, чытачамі. Кожны здымак дапасуюць паэтычныя радкі. Іх аўтары – амаль дваццаць паэтаў Міншчыны. Яднанне фотаработ і мастацкага слова робіць старонкі выдання надзвычай прыцягальнымі, душэўна цёплымі і шчырымі. Да таго ж, вершы маюць англійскі пераклад.
Прэзентацыя фотаальбома адбылася ў розных кутках Беларусі. Шмат яго прыхільнікаў знайшлося за мяжой: у Англіі, Славакіі, Францыі, Грузіі, Латвіі…
І вось зараз Уладзіслаў Цыдзік прадстаўляе свой творчы праект у роднай альма-матэр. Робіць ён гэта не без хвалявання. Тут прайшлі лепшыя студэнцкія гады жыцця. Тут ён зацвердзіўся ў правільнасці выбару сваёй прафесіі. Тут навучылі яго па-сапраўднаму любіць родную беларускую зямлю, якую ён зараз ухваляе сваёй творчасцю.
Анонс падрыхтаваны на падставе матэрыялаў Алены Стэльмах.