Не менш, як 15 гадоў, даводзілася праводзіць экскурсіі для гасцей нашага ўніверсітэта. Яны могуць працягвацца 3 гадзіны, а часам і 6-7. Бо на кожным кроку нашага горада можна расказаць шмат цікавага. Вандроўнікамі на гэты раз аказаліся студэнты першага курса агранамічнага агранамічнага факультэта ГДАУ, сярод якіх былі і тры студэнткі з афрыканскіх краін.
Што ж можна расказаць студэнтам ад самага пачатку? Ды час пабудовы галоўнага корпуса, двух інтэрнатаў і сталовай, аб тым, што за нашым стадыёнам цягнуліся бяскрайнія палі вучгаса і ў якім годзе былі пабудаваны першыя тры будынкі на месцы Дзевятоўкі. Памяць захавала калі і кім былі пасаджаны першыя дрэвы і астатнія ў нашым дэндрарыі. І шмат іх былі пасаджаны маімі аднакурснікамі, асабліва ў апошнюю восень нашай вучобы ў 1978 годзе. Да тых пасадак можна аднесці і шэраг бяроз, якія растуць каля стадыёна за першым і другім інтэрнатам.
Раслінаводчы корпус - былы паляўнічы домік апошняга Польскага караля Станіслава Аўгуста Панятоўскага, першыя літары імя якога выразна чытаюцца на манаграме будынка з боку парку. Крыху пагадалі, што за літара R, і даведаліся, што яна ад лацінскага слова Rex – Кароль. Каля каралеўскай рэзідэнцыі захаваліся двухпавярховыя стайні з 18 стагоддзя, у якіх яшчэ ў гады маёй вучобы стаялі каровы і іншыя жывёлы, з якімі мы займаліся, хоць і былі аграномамі.
Злева нашага шляху Заапарк, гісторыя якога звязана з імем выкладчыка біялогіі гімназіі імя А.Міцкевіча Яна Каханоўскага, ў будынку якой зараз знаходзіцца наш біятэхналагічны корпус. Ды і пра гісторыю яго пабудовы і Лідэрсаў, ад дырэктара рэальнага вучылішча імя цэсарэвіча Алексія Уладзіміра да яго праўнука Аляксанда, які ўжо тры разы наведваў Гародню.
Цікавым з’яўляецца і факт перабудовы трохпавярховага вадзянога млына з нейкім частковым захаваннем знешняга выгляду, але не якасці пабудовы. Мы пагаварылі і пра завод гандлёвага машынабудавання, а таксама пра завод, дзе раней рабіліся штампаваныя вырабы з металу, на якім з-за грукату маглі працаваць толькі глуханямыя людзі. Крыху гісторыі Лютэранскай Кірхі, дому афіцэраў, цукеркавай фабрыкі, будынку факультэта ветэрынарнай медыцыны. У так званым Старым корпусе ГДАУ зайшлі і пагрэліся.
Далей шлях пралягаў праз парк імя Э.Жылібера, дзе можна расказваць пра гісторыю яго Медычнай акадэміі, пра сучасны тэатр лялек, які знаходзіцца ў будынку тэатра оперы і балета 18 стагоддзя, пра палац Тызенгаўза, у скляпеннях якога пахаваны партызаны, падпольшчыкі і воіны, якія вызвалялі горад. І нарэшце расказаў пра будынкі на плошчы Тызенгаўза і гісторыю рэстаўрацыі самой плошчы, пра афіцэрскую сталовую, якая знаходзілася ў будынку карчмы “Галеча”, таксама пабудаванай ў 18 стагоддзі.
Яшчэ прашлі паміж палацам віцэ-губернатара Максімовіча, дзе ў пачатку 19 стагоддзя спыняўся брат Напалеона Жэром Банапарт, а пазней амаль два гады працаваў губернатар Сталыпін і палацам князей Масальскіх. Такім чынам мы аказаліся там, дзя яшчэ раз змаглі сагрэцца і паабедаць. Назад вярталіся пешкі. Стараста групы Раман выказаўся, што можа як іншым разам збяромся, каб пазнаёміцца з астатняй часткай горада. Гід не супраць.