14 мая 2015 года ў Гродзенскай вобласці на базе СПК "Абухава", СПК "Прагрэс-Вярцялішкі" і Гродзенскага дзяржаўнага аграрнага ўніверсітэта адбыўся рэспубліканскі семінар, прысвечаны дагляду за пасевамі сельскагаспадарчых культур ва ўмовах 2015 года.
У працы семінару ўдзельнічалі кіраўнікі і спецыялісты Міністэрства сельскай гаспадаркі і харчавання, спецыялісты галоўнай дзяржаўнай інспекцыі па насенняводству, каранціну і ахове раслін, начальнікі абласных інспекцый па ахове раслін, навуковыя супрацоўнікі навукова даследчых інстытутаў Беларусі, прадстаўнікі айчынных прадпрыемстваў па вытворчасці сродкаў аховы раслін.
У палацы СПК "Абухава" семінар адкрыў намеснік міністра сельскай гаспадаркі і харчавання Рэспублікі Беларусь Уладзімір Уладзіміравіч Гракун. У СПК "Абухава" удзельнікі семінару пабывалі на палях азімых і яравых збожжавых культур. Аб іх стане і дагляду за пасевамі распавёў галоўны аграном СПК Віктар Міхайлавіч Кузміцкі. У каментарыях удзельнічалі прадстаўнікі навуковых інстытутаў.
У СПК "Прагрэс-Вярцялішкі" з палямі азімага рапсу, цукровых буракоў і кукурузы ўдзельнікаў семінару знаёміў галоўны аграном Іван Аляксандравіч Галавенка. І тут у каментарыях прынялі ўдзел прадстаўнікі 4 навукова-даследчых інстытутаў.
Працяг канферэнцыі быў на вопытным полі Гродзенскага дзяржаўнага аграрнага ўніверсітэту. Аб даследаваннях сродкаў аховы раслін, стымулятараў росту, якія выпускаюцца беларускімі фірмамі, на розных сельскагаспадарчых культурах гасцям расказаў Дзмітрый Аркадзьевіч Брукіш. У размове па даследаваннях выкарыстання ўгнаенняў на асноўных палявых культурах ва ўмовах вясення-летняга перыяду прыняў удзел Сяргей Іванавіч Юргель.
Мне было прыемна яшчэ раз пабачыцца са сваёй аднакурсніцай Ядвігай Эдуардаўнай Пілюк, якая прымала актыўны ўдзел ва ўсіх абмеркаваннях, асабліва што датычыць пасеваў азімага рапсу. Гэта пад яе кіраўніцтвам за шмат гадоў выведзены новыя гатункі рапсу, якія вельмі прадуктыўны ва ўмовах нашай рэспублікі. У гэтым годзе адзін з гатункаў уласнай селекцыі вельмі добра перазімаваў, калі іншыя, заходнія не вытрымалі такой цёплай зімы. Ад яе я даведаўся, што Ядвіга Эдуардаўна падрыхтавала ўжо 5 кандыдатаў навук і зараз пад яе кіраўніцтвам працуюць 16 навукоўцаў.
Апошнім аб'ектам, з якім пазнаёміў удзельнікаў семінару загадчык вопытнага поля Павел Славаміравіч Шэшко, быў пладова-ягадны сад нашага ўніверсітэту. Па тых кветках, якімі ўсыпаны зараз невялікія дрэўцы, можна гадаць, што ў гэтым годзе мы будзем з добрым ураджаем яблык. Абрэзкай саду займаліся нашы студэнты агранамічнага факультэту, якія праходзяць вытворчую практыку на вопытным полі.
Удзельнікі семінару пакідалі вопытнае поле, каб працягнуць працу ізноў у палацы культуры СПК "Абухава". У праграме заставалася яшчэ шмат кароткачасовых выступаў спецыялістаў рознага накірунку. Ва ўніверсітэт мы вярталіся разам з прарэктарам па навуковай працы Сяргеем Анатольевічам Тарасенка. Прыйшлі да высновы, што гасцям наша вопытнае поле і тыя даследаванні, якія там праводзяцца спадабалася. Уся яго плошча практычна ўжо занятая культурамі, акрамя пясчаных выспаў, вельмі з нізкім утрыманнем гумусу, на якіх будуць размешчаны пасевы грэчкі. Так што праца пчол, якія зараз лятаюць над азімым рапсам будзе забяспечана не толькі рапсам яравым, але і пасевамі грэчкі.
Калі пасевы на вопытным полі наблізяцца да тэрміну ўборкі, яны стануць аб'ектам для правядзення семінараў аграномаў і іншых кіраўнікоў сельскай гаспадаркі, а магчыма і замежных спецыялістаў на ФПК.
https://www.ggau.by/nowosti/2393-udzelniki-respublikanskaga-seminaru-na-vopytnym-poli-gdau#sigProId0d87745a3b