Выстава-ярмарка перад галоўным корпусам аграрнага ўніверсітэту адбылася 10 і 11 кастрычніка. Калі месяц назад на выставе вінаграду я змог набыць толькі адзін гатунак, дык на гэтай - тры гатункі яблынь. Былі на ёй прадстаўлены не толькі яблыні ды грушы, але і слівы, вішні, чарэшні і іншыя ягадныя культуры.
Тут жа прадавалася і тэхніка малых памераў для працы на садовых участках, угнаенні, сродкі хімічнай аховы раслін, насенне. А з саду нашага вопытнага поля можна было даволі танна набыць яблыкі гатунку Беларускае салодкае. Саджанцы яблынь таксама былі недарагія. Як пасля падзяліўся са мной сусед па дачы Валянцін, іх кошт быў у 2 разы меншы, чым на рынку.
На выставе за два дні пабывала шмат гарадзенцаў, якім даводзілася выстаяць вялікія чэргі для таго, каб набыць абраны гатунак той ці іншай культуры. Заўважыў, што яе наведвалі не толькі нашы сучасныя студэнты, але і выпускнікі, якія вучыліся ў ГДАУ некалькі гадоў таму. Выстава ў 2014 годзе была першай, але надалей яна будзе традыцыйнай i, як давялося пачуць, маладыя прывітыя расліны ўжо набіраюцца моцы, каб у наступным годзе патрапіць у рукі садаводам-аматарам.
https://www.ggau.by/nowosti/2199-vystava-yarmarka-sadzhantsa-i-syago-neabkhodnaga-dlya-sadovykh-uchastka#sigProId17332ed49b